KORONADAL CITY- Nagsugod na subong nga adlaw ang pagpatigayon sang operasyon sang Koronadal City Traffic Office batuk sa mga colorum vehicles.
Sa interbyu sang Bombo Radyo Koronadal kay Koronadal City Traffice Office chief Ruel Bagunoc, ang nasambit nga operasyon ang may tinutuyo nga maprotehiran ang riding public kag ang mga lehitimo nga mga drivers sa siyudad.
Nahibaluan nga talalupangdon na ang pagdata sang mga indi lisensiyado nga mga driver kag mga salakyan nga nagatuga sang problema sa dalanon.
Ginatudlo man nga ang mga colorum vehicles ang isa sa mga nagatuga sang trapiko sa siyudad bangud sa pagdagsa sang mga ini nga ginakabalak-an indi taga Koronadal apang nagdayo lamang sa siyudad agud magpamasada.
Kaangot sini pabor naman ang mga lehitimo nga mga drivers sa siyudad nga ipatuman ang operasyon sa pagpangdakop sa mga ini agud nga mahagan-hagan ang ila ka-kumpetensiya sa biyahe kag matudluan ang mga ini nga nagakadapat magsunod sa laye nga ginapatuman sa siyudad.
Samtang pahayag naman sang pila ka mga colorum drivers nga kuntani maluoy suno pa sa ila ang lokal nga gobyerno bangud wala sila sang palangabuhian, apang kun ipadayon ini wala naman sila sang mahimo.
Pahayag naman sang City Traffic Office nga ang laye ang nagakadapat ipatuman kag sundon bangud ini ang para sa ikaayo sang tanan.
