KORONADAL CITY – Nagapadayon ang imbestigasyon sang mga otoridad sa nasapwan nga bangkay sang isa ka construction worker pasado alas-5 kaina sang kaagahon sa Purok Ragsak, Barangay San Felipe, Tantangan, South Cotabato.
Ginkilala ni Police Major Randy Apostol, hepe sang Tantangan MPS ang biktima nga si Ceasar Cocjin Dañucop III, 45-anyos, nga residente sang Barangay GPS, Koronadal City.
Suno kay Apostol, positibo nga ginkilala sang iya pamilya ang bangkay nga nag-angkon sang multiple gunshot wounds sa nagkalain-lain nga bahin sang iya lawas nga gintunaan sang kamatayon sini.
Nahibaluan nga nagatrabaho sa banwa sang Tupi ang biktima bilang construction worker kag stay-in ini apang palaisipan kun ngaa nakaabot ini sa banwa sang Tantangan.
Wala naman sang may nakuha nga mga basiyo sang bala sa lugar kun sa diin nasapwan ang biktima magluwas sa isa ka sling bag nga madamo sang mga ID.
Gilayon nga gindala sa punerarya ang biktima kag ginpidalom sa post mortem examination agud mahibaluan kun pila ang igo sang bala nga naangkon sini.
Dako naman ang pagpati sang kapulisan nga sa iban nga lugar ginpatay ang biktima kag ginhaboy lamang didto..// May mga nakabati man daw sang asod-asod nga lupok pasado ala-una kaina sang kaagahon nga kalakip sa pagaimbestigaran.
Sa ngayon, blangko pa ang otoridad kun sin-o ang responsable sa krimen kag kun ano ang motibo sa pagpatay sa biktima.
