KORONADAL CITY – Dako ang posibilidad nga magadugay pa kag magalala ang kalakasan sa Marawi City kun wala ginpabakod sang Korte Suprema ang deklarasyon sang Martial Law sa Mindanao.
Ini ang reaksiyon ni Atty. Eliordo Ogena, bise alkalde sang siyudad sang Koronadal sa interbyu sang Bombo Radyo Koronadal.
Suno kay Ogena, kun wala ginpaburan sang Korte Suprema ang desisyon ni Pangulong Rodrigo Duterte sa pagdeklarar sang Martial law, posible nga matabo ang constitutional crisis sa pungsod.
Suno pa sa iya, ang kalakasan nga natabo sa Marawi kag ang pamahog sang terorismo sa bug-os nga Mindanao ang isa sa mga factual basis nga nakita sang Korte Suprema sa ginpaguwa nila nga desisyon.
Dugang pa sini nga mahimo magpasilabot man ang pila ka mga pungsod sa matabo nga kinagamo sa Pilipinas labi na ang Estados Unidos, China kag Russia.
Apang bangud nga pabor sa administrasyon ang desisyon sang Korte Suprema, dako ang mabulig sini agud nga maghiliusa ang mga Pilipino agud nga tapuson ang nagakatabo nga Marawi siege.
Rason nga kasubong sang iban nga mga opisyal, nagapanawagan si Ogena sa mga petisyuner nga respetuhon ang desisyon sang Supreme court.
