KORONADAL CITY – Ginahulat pa tubtob sa karon ang confirmatory result halin sa RITM kun positibo ukon indi sa coronavirus infectious disease ukon COVID-19 ang 51-anyos nga PUI nga napatay sa siyudad sang Koronadal.
Ini ang ginkumpirmar ni City Health Officer Dr. Editho Vego sa interbyu sang Bombo Radyo Koronadal.
Suno kay Dr. Vego, ginbawian sang kabuhi ang isa sa apat ka patient under investigation (PUI) samtang yara sa balay-bululngan.
Apang ginpaathag sang opisyal nga napatay ang nasambit nga pasyente bangud sa Severe Acute Respiratory Illness (SARI) .
Samtang,ginpaathag sini ngaa madamo ang napagkit nga persons under monitoring sa siyudad kun sa diin kadam-an sa mga taga-diri ang naga-abroad samtang nagapadulong naman sa iban nga lugar ang pipila.
Bangud diri, makit-an ang hugot nga monitoring sa kada checkpoint sa mga entry point sang siyudad.
Panawagan man sini nga kuntani magpabilin na lamang ang mga pumuluyo sa ila nga mga puloy-an agud indi na madugangan ang mga kaso mangin ang ila obra.
Base sa datos sang Task Force Covid, masobra 800 ang napagkit nga PUMs kun sa diin 40 diri ang na-discharge na samtang 10 naman ang PUIs.
Sa nasambit nga numero, anom diri ang naka-confine sa ospital samtang apat diri ang nakaguwa na.
