KORONADAL CITY – Ginpasiguro sang Comelec sa banwa sang Tboli, South Cotabato nga pagaimbestigaran nila ang natabo nga lapnagon nga vote buying sang nagligad nga eleksiyona matapos nga naguwa man ang mga supporters sang mga kandidato sa Sannguniang Kabataan.
Sa ekslusibo nga interbyu sang Bombo Radyo Koronadal kay T’boli South Cotabato COMELEC officer Nemia Española, wala niya ginabalewala ang ginpasaka nga petisyon sang mga napierde nga kandidato kaupod na ang reklamo angot sa suno pa vote buying.
Ini makaligad nga nagpadulong sa Bombo Radyo Koronadal ang 4 ka mga reklamante bangud daw sa nagluntad nga vote buying sa ila nga lugar.
Ginpahayag sa Bombo Radyo ni alyas Jam-Jam nga luyag nila nga mapukaw ang atensyon sang COMELEC bangud nabalaka sila sa natabo nga vote buying sang eleksiyon.
Kalakip sa mga ginsaysay sang mga ini amo ang isa ka residente sang Prk. Logan 3 sang Brgy. Poblacion nga naakig matapos nga kulang sang P50 ang ginhatag nga kwarta matapos nga ginbaligya suno pa ang iya boto sa P150.
Bangud kulang sang P50 naglab-ot sa tampaanay ang insidente.
Handa naman nga maguwa ang mga reklamante kag ihan-ay ang mga ebedensiya nga ila ginauyatan.
