Gin suspinde sang Commission on Elections (Comelec) ang proklamasyon sang Duterte Youth kag Bagong Henerasyon nga mga party-list bangud sang mga nakabinbin nga petisyon para sa ila diskwalipikasyon.
Suno sa resolusyon sang National Board of Canvassers, “seryoso ang alegasyon” sang paglapas sa balaod sa eleksyon nga ginpasaka batuk sa duha ka party-list.
Makita nga ang mga petisyon batuk sa Duterte Youth ginpasaka nanday Reeva Magtalas kag iban pa sang Mayo 15, kag sang Youth Advocates for Climate Action Philippines upod ang mga student regents sang PUP kag UP sang Mayo 8.
Samtang isa ka abogado nga si Russel Stanley Geronimo naman ang nagpasaka sang kaso batuk sa Bagong Henerasyon.
Ginpanginwala sang Duterte Youth ang suspensyon kag ginsiling nga ini isa ka “grave abuse of discretion.” Nagbanta man ang ila chairman nga si Ronald Cardema nga iya ibulgar ang ginasiling nga korapsyon sa Comelec kag Kongreso kon indi sila pasudlon.
Samtang, nagsiling ang Bagong Henerasyon nga wala sila sang nabaton nga abiso parte sa kaso kag nagpanawagan sa Comelec nga ipadayon ang ila proklamasyon bilang representante sang masobra 319,000 ka botante.
Sa subong, may nakuha nga 5.6% nga boto ang Duterte Youth nga katumbas sang tatlo ka puwesto sa Kongreso, samtang may isa naman ka puwesto ang Bagong Henerasyon bangud sang nakuha nga 0.8% nga boto.
