KORONADAL CITY – Tigayon nga ginsuspendir sang Civil Service Commission (CSC) ang igapatigayon nga 2020 Career Service Examination-Pen and paper Test (CSE-PPT) sa bug-os nga pungsod nga natalana sa Marso 15,2020.
Sa eksklusibo nga interbyu sang Bombo Radyo Koronadal kay CSC Regional Director Resurreccion Pueyo, nga ang pagsuspendir ang may kaangtanan kag pagsunod sa kamanduan ni Pangulong Rodrigo Duterte pinaagi sa proclamation No. 922 nga nagadeklarar sang State of Public Health Emergency sa bug-os nga pungsod.
Ang CS exams ang ginalauman nga igapatigayon sa 66 ka testing locations nationwide kag ginabulubanta nga magalab-ot sa 293,845 ka mga indibidwal sa bug-os nga pungsod ang nagparehistro.
Ginabulubanta nga yara sa 253, 419 ang magakuha sang Professional Level sang exam samtang yara sa 40, 426 ang nagapaninguha nga makapasar sa subprofessional level.
Dugang pa ni Dir. Pueyo, nga ini ang nagakaigo nga tikang nga himuon kabahin sang preemptive health measure.
Ini agud mahagan-hagan ang pagsaka sang numero sang COVID-19 cases kag pagsuporta sa national kag local government units sa pagpatigayon sang nagakaigo nga tikang sa pagsabat sa outbreak kag pag-eliminate sang pamahog sang COVID-19.
