Wala nalikawan ni City Road Safety and Traffic Management Officer Roel Bagunoc nga makapaguwa sang iya hibubun-ot angot sa isyu sang iya investigative report nga iya ginsumiter sa talatapan ni Mayor Eleordo Ogena.
Madumdoman nga naghimo siya sang nasambit nga report angot sa isyu sang pagpangotong nga nagakatabo sa iya talatapan kag nagproponer sang mga rekomendasyon batok sa ginhimo sang gin-relieve nga deputy operations officer nga si Perlie Tolentino.
Suno kay Bagunoc, naghulat siya sang 36 ka oras agud masabat ni Mayor Ogena ang iya ginpasa nga investigative report apang wala ini naaksyonan.
Gani paano suno pa siya makapasar sang ikaduha nga tranche sang iya report kun wala naaksyonan ang nahauna nga iya ginpasa.
Dugang ni Bagunoc, nagaserbe nga hangkat diri kun may yara suno pa sang political will si Mayor Ogena nga matapna ang katuntohan sa iya mga ranggo bangud siya mismo ang hands-on nga matapna ang katuntohan sa iya mga personnel, apang ang alkalde ang may ulihi nga desisyon sa ila mga kaso.
Nagapati man siya sa 10-point development agenda ni Mayor Ogena apang ginkwestyon ang pagkaseryoso diri sang alkalde bangud para sa iya, nakasugal ang iya kredibilidad kag integridad, masunod lamang ang nasambit nga mga agenda bangud luyag niya nga maproteheran ang administrasyon ni Mayor Ogena.
Gin-ako man sini nga may pila suno pa ka mga tinawo ni Mayor Ogena sa iya talatapan nga nagahimo sang gamo, kag ginpaathag nga magaresulta lamang ini sa pagkaguba sang alkalde.
Ginhatagan punto man sini nga kun nagapabilin ang katuntohan, wala sang Bagong Koronadal bangud nagapabilin nga bulok ang sistema.
Kaangot sini, abri ang linya sang Bombo Radyo Koronadal para kay Mayor Ogena agud nga makahatag man ini sang iya punto angot sa sini nga isyu.
