KORONADAL CITY – Gilayonnga gin-aksiyunan sang LGU Koronadal ang concern sang pamilya Arinzol sa suno pa indi maayo nga pagpalubong sang ila nga himata nga ginkilala kay Rosalia Arinzol nga residente sang Prk. Bayanihan, Brgy. Sto. Niño, siyudad sang Koronadal makaligad nga gintawag nga isa sa mga PUI angot sa coronavirus disease, apang wala napamatud-an kag napatay bangud sa asthma.
Ini ang nangin pahayag ni Koronadal city Mayor eliordo Ogena sa eksklusibo nga interbyu sang Bombo Radyo Koronadal.
Personal nga na-istorya ni Mayor Ogena ang pamilya kag ginmanduan na ang mga responsable nga ahensya sa iya administrasyon nga sa gilayon buligan nga mapalubong sang ensakto ang himata sang pamilya Arinzol sandig sa kostumbre sang mga kristiyano.
Samtang ginpasabat naman ni Mayor Ogena ang mga persona nga may kaangtanan sa isyu angot sa biktima nga si Rosalia Arinzol kag tigayon naman nga nagpangayo sang pasaylo sa pamilya.
Kaangot sini, ginpakigbahin ni Ricky Arinzol bata sang nagtaliwan nga si Rosalia Arinzol nga nahinun-anon na nila ang LGU kag ginpasalig nga hatagan sang nagakaigo nga lubong ang ila nga iloy.
Naghingyo naman sang pasaylo ang pila ka mga concern nga persona sa isyu ilabi na si City Health Officer Dr. Editho Vego.
Lubos naman ini nga nagapasalamat sa LGU Koronadal sa pagsabat sang ila nga concern mangin man sa pila pa ka mga nagapalab-ot man sang pakigsimpatiya sa ila sa pagtaliwan sang ila nga himata.
Dugang pa nga ginpasalamatan man sini ang Bombo Radyo Koronadal sa paghatag sang ligwa agud nga maathagan ang tanan sa nangin sitwasyon sang ila nagtaliwan nga iloy.
Nahibaluan nga ang napatay nga si Lola Rosalia ang maukod man nga tagpasakop sang mga promo sang Bombo Radyo.
