KORONADAL CITY – Ginapatuman na subong ang citizen’s arrest sa siyudad sang Koronadal, sa tunga sang nagapadayon nga pagpatuman sang enhanced community quarantine.
Ini ang ginpahayag ni Koronadal City Mayor Eliordo Ogena kasunod sang nabaton nga mga reklamo nga madamo sa gihapon nga mga pumuluyo ang nagabayolar sa mga pagsulondan labi na sa social distancing kag sa curfew.
Suno sa alkalde, luyag niya nga hugot ang pagpatuman sini labi na nga madamo ang nagaabuso sa pihak sang mga ginpalapta nga mga BPATs, police officials kag mga law enforcement augmenting forces.
Bahala na suno pa nga mapuno ang presohan basta matudloan sang leksyon ang mga salawayon.
Nahibaloan nga ang first penalty amo ang stern warning, second penalty ang multa nga P500 kag ikatatlo nga penalty naman ang P1,000 kag pagkapreso.
Nagalaum naman ini nga dako ang mabulig sini sa mas epektibo nga pagpatuman sa social distancing kag pagdagsa sang madamo nga tawo labi na sa downtown area.
