Nagpahanumdom ang Commission on Human Rights (CHR) sa mga katapo sang Kingdom of Jesus Christ (KJC) nga hatagan sang importansya sang pagtahod sa pwersa sang estado paagi sa pagpahanugot sa ila nga himuon ang ila katungdanan kag maglikaw sa mga akto nga mahimo magpadaku sang tension ukon makaupang sa legal nga proseso.
Nagpagwa sang pahayag ang Commission on Human Rights matapos gin-raid sang ginabanta 2,000 ka mga katapo sang Philippine National Police (PNP) ang KJC compound sa Buhangin District, Davao City agud magserbe sang arrest warrants batok sa fugitive televangelist nga si Apollo Quiboloy kag iban pa. Si Quiboloy ang ginapangita bangud sa child abuse, sexual abuse, kag qualified trafficking cases.
Suno sa komisyon, ginapahanumdom sa mga sumalakdag ni Pastor Quiboloy nga likawan ang pag-harass sa mga sibilyan nga naga-obra lamang sang ila katungdanan.
Dugang pa sini nga ini nga pahanumdom nagasunod sa mga report nga ang isa ka imbestigador gikan sa Commission on Human Rights Region XI ginpahog kag gin-harass sang pila ka mga katapo sang KOJC.
Ginpahayag man sang komisyon nga hugot nga gina-monitor ang sitwasyon sa KJC compound sa Davao City, nga nagapahanumdom sa PNP nga mag-exercise sang maximum tolerance kag ginapadaku nga “wala sang violenece ukon indi kinahanglan nga pwersa ang gamiton sa paghimo sang pag-aresto.
Dugang sini, nagpahanumdom man ang Komisyon sa Philippine National Police nga mag-exercise sang maximum tolerance kag siguraduhon ang safety sang tanan, ilabi na sang mga kabataan.
Ginhatagan man punto sang Commission on Human Rights nga ang rule of law ang dapat magpangibabaw agod masiguro nga ang mga kinamatarong sang tanan ginasakdag kag ginaamligan.
Samtang,nagapanawagan man ang ahensya sa tanan nga apektado nga magpabilin nga kalmado kag magkooperar sang bug-os sa legal nga mga paghusay, sa interes sang katarungan kag paghidait.
