KORONADAL CITY – Ginpahayag ni Commission on Human Rights 12 Director Erlan Deluvio nga wala pa sang ginpalab-ot sa ila nga reklamo nga paglapas sa tawhanong kinamatarong angot sa pagpangdakop sang mga tambay nga kamanduan ni Pres. Rodrigo Duterte kag gina implementar sang Philippine National Police.
Sa interbyu sang Bombo Radyo Koronadal kay Director Deluvio, wala sang problema sa pagdakop ilabi na kun may mga makomiter nga mga bayolasyon apang nagakadapat nga magsunod man sa nagakaigo nga proseso ang mga otoridad kag nagakadapat nga may yara sang balasehan sa pagpangdakop.
Apang nagapati man ini sa ikasarang sang PNP nga maka detect sa mga persona nga makaduluda ukon may kriminalidad nga ginahimo para sa proteksyon sang mga pumuluyo.
Dugang pa ni Deluvio nga suportado nila ang pagpatuman sang seguridad sang kapulisan sa mga pumuluyo pinaagi sa pagpangdakop sang mga Tambay.
Apang nagakadapat nga siguraduhon nga ang mga tambay nga madakpan ang may yara sang ginalapas nga layi akon may bayolasyon nga posible mangin dako nga pamahog sa seguridad sang mga pumuluyo.
Sa pihak sini gin-insister ni Deluvio nga wala nagapamalabag ang Commission on Human Rights sa implementasyon sang layi bangud ang Law enforcement ang may tinutuyo nga protehiran ang tawhanong kinamatarong sang mga pumuluyo apang nagalaum ini sang balanse kag patas nga pagpatuman sang layi.
