KORONADAL CITY- Nagapakig-angot na sa subong sa Regional Internal Affair Services (RIAS) sang PNP ang pamunuan sang Commission on Human Rights Region 12- (CHR-12) angot sa pag-imbestigar sa pagkapatay sang 2 ka mga miyembro sang IPs sa ginpatigayon nga operasyon sang mga kapulisan sa bahin sang Sitio Ebenezer, Brgy. Rang-ay, Banga South Cotabato sang Marso 18 2022.
Ini ang nangin pahayag ni Atty. Keysie Gomez, OIC Regional Director sang CHR-12 sa interview sang Bombo Radyo Koronadal.
Suno sa iya, naga padayon na sa subong ang kooperasyon sang ila nga pamunuan sa PNP sa diin under ang mga responsable nga mga pulis sa pagpatay kanday Roberto Lapastora, 41 anyos kag Jemiles Dasan, 14 anyos nga wala man sang kaangtanan sa mga ginapangita sang mga otoridad.
Dugang pa sini, natapos na ang autopsy nga ginpatigayon sang ila nga talatapan sa patay nga lawas sang mga biktima agud nga imbestigahan ang ila nga kinamatyan kag ginahulat nalang ang resulta sang amu nga otopsiya.
Ginpasiguro naman sini nga magapanabat ang maga katapo sang mga kapulisan nga nagpatigayon sang palpak nga operasyon.
Kadungan sini, nagpaguwa man sang sympatiya ang pamunuan sang National Comission for Indigenous People Region 12 sang pagkondina sang nsambit nga mga panghitabo kag nagpaguwa sang kasulatan sa hugot nga panawagan sang hustisya sa nadangtan sang miyembro sang tribo.
Madumduman nga sang Abril 9 2022 , gin dul-ong ang mga biktima sa ila ulihi nga palahuwayan sa isa ka pribado nga lulubngan.
