Sa pihak sang pagtinguha sang pungsod Pilipinas nga masolbar kag mapahagan-hagan ang tensyon sa West Philippine Sea (WPS) nga sakop sang exclusive economic zone (EEZ) sini kag ginakilala sang international community, padayon naman ang paglakbang kag paglapas sa kinamatarong sang Pilipinas sang poderoso nga China.
Sa report sang Armed Forces of the Philippines, nagdangat na sa 163 ka mga barko sang China ang nasiplatan sa amo nga lugar.
Ini na ang pinakamadamu nga numero sang mga barko sang China nga nakit-an sa WPS sa nakaligad nga tatlo ka bulan.
Ginalakipan ang nasambit nga mga sakayan sang 127 ka Chinese maritime militia vessels, 18 People’s Liberation Army Navy ships, 16 China Coast Guard vessels, kag duha ka research vessels.
Ginakabalak-an sa karun ang padayon nga agresibo nga aksyon sang China sa amo nga kalalawran nga mahimo tunaan sang “miscalculation” ukon panibag-o nga gumontang.
