KORONADAL CITY – Nagpaandam sa subong ang hepe sang Philippine National Police sa tanan nga Chief of police sa Rehiyon Dose nga mahimo nga kakason ang mga ini sa tion nga indi matapna sang mga ini ang drag racing sa ila nga mga banwa ukon syudad nga ginabantayan.
Sa pahayag ni PGen. Nicolas Torre III- PNP Chief, ginhatagan sini sang punto nga wala sang lugar sa Rehiyon Dose sang Drag racing kag dapat nga matapna ang mga ini sang mga kapulisan.
Wala naman nagapati si Torre nga mas maayo pa ang mga kabataan nga nagapatigayon sang Drag racing sa Rehiyon kun ikumparar sa mga hepe sang mga kapulisan.
Dugang pa sini, indi ini mag duha-duha nga kakason ang sin-o man nga hepe sang pulis sa Rehiyon nga mapaslawan sa pagtapna sini nga problema.
Ginpahayag pa ni Torre nga magluwas sang 5 mins response time sang PNP, mahimo man magamit sang mga Pilipino ang 911 hotline sang otoridad sa diin man nga bahin sang Pilipinas agud nga magpangayo sang bulig sa tion sang emergensiya.
Liwat naman nga nagpanawagan ini sa tanan nga magkooperar sa mga otoridad agud nga mapabilin ang kalinong kag katawhayan sa bilog nga pungsod Pilipinas.
