KORONADAL CITY- Ginatinguhaan karon nga maretrieve sang Isulan PNP ang kuha sang CCTV Camera sa ginluntaran sang pagsigabong sang Improvised Explosive Device sa isa ka internet shop sa banwa sang Isulan, Sultan Kudarat nga ginkapatay sang 2 kag yara naman sa 15 ang pilason.
Sa ekslusibo nga interbyu sang Bombo Radyo Koronadal kay PSupt. Junie Buenacosa, ang bag-o nga hepe sang Isulan Municipal Police Station nga uyat na nila ang CCTV camera kag ang memory card sini apang sang gintilawan ini nga maretrieve sang PNP 12 Anti-Cybercrime Group ang lunsay itom na lang ang naga gwa sa kuha sang CCTV.
Nahilisugtan nga dal-on ini sa PNP Anti-Cybercrime Group sa Camp Crame agud masolusyunan kag maretrieve ang kuha sang CCTV camera agud mapadasig ang imbestigasyon kag madakpan ang yara sa likod sang ikaduha nga pagsigabong sa Isulan.
Kumpyansa ang PNP nga may paglaum pa nga marekober ang kuha sang CCTV camera bangud naga gana pa ini.
Nakig-angot naman ang PNP sa mga kalapit nga establisemento na may yara sang CCTV camera nga naka install bangud posible nga nakuhaan man sang camera ang suspek sa likod sang ikaduha nga pagpasigabong sa Isulan.
