KORONADAL CITY – Tuman nga ginkakibot sang National Union of the Journalists of the Philippines (NUJP) ang ginhimo nga tikang ni solicitor general Jose Calida nga pagsang-at sang quo warranto petition batok sa higante nga TV network nga ABS-CBN Corporation.
Ini ang nangin reaksyon ni NUJP director Kath Cortez sa interbyu sang Bombo Radyo Koronadal, makaligad nahibaloan ang nasambit nga tikang batok sa nasambit nga media company.
Suno kay Cortez, kasubong nga gin-overpower ni Calida ang Kongreso may kaangtanan sa renewal sang prangkisa sang ABS-CBN.
Para sa iya, indi dapat suno pa dapat usaron ni SolGen Calida ang nasambit nga petisyon bangud lang sa rason nga ginbayolar suno pa sang TV network ang madamo nga mga layi, apang indi naman niya matumod sa mga interbyu kun ano nga mga layi ang nalapas sang kumbyohan.
Nagakabalaka man ini nga kun mahimo ini ni Calida sa dalagkoan nga mga TV networks kag media organizations, posible nga mahimo niya man ini sa iban ukon dyutay nga iban pa.
Ila man nga ginakabalak-an ang pagkadula sang obra sang 15,000 ka mga trabahante sang nasambit nga network sa ila national kag regional TV networks.
Gani apela na lamang sini nga pabay-an anay ang Kongreso kag Senado nga ipadayon ang hearing bangud diri magaguwa kun may violation gid bala nga naangkon ang ABS-CBN.
