KORONADAL CITY – Liwat na naman nga ginpalawig sang South Cotabato Provincial Government ang ginapatuman nga calibrated total lockdown sa probinsya.
Ginalauman nga magatakop kuntani ini subong nga adlaw, Abril 14 apang nadesisyonan ni Governor Reynaldo Tamayo Jr. nga palawigon ini tubtob Abril 30.
Suno kay Governor Tamayo, gindihon ang Executive Order No. 23 nga nagapalawig man sa enhanced community quarantine makaligad ang pagsinapol sang Inter-Agency Task Force (IATF) provincial chapter nga ginalakipan sang mga provincial directors sang nagkalain-lain nga ahensiya kag mga LGU officials sa bug-os nga probinsya.
Ginbase man ini sa regional executive orders kag sa mando halin sa national government.
Ginduso man sini nga wala sila nagapakampante sa mga mahimo nga matabo bangud sa covid-19.
Sa pihak sini, ginpasiguro sang gobernador nga kontrolado nila ang sitwasyon kadungan sang paghangyo sang paghangop kag kooperasyon sa mga pumuluyo.
