KORONADAL CITY – Nagapadayon ang imbestigasyon sang mga otoridad sa pagpangluthang-patay sa isa ka CAFGU sa Sitio Tablogan, Brgy. Aflek, Tboli, South Cotabato.
Ginkilala sang Tboli, PNP ang biktima kay Modskie Macabangin Vicente, 57-anyos kag residente sang Brgy. New Ilo-Ilo, Tantangan, South Cotabato.
Sandig sa imbestigasyon sang Tboli PNP sa pagpanguna ni PEMS Jamael G. Amaikurut, nahibaluan nga sakay sa Suzuki 110cc nga motorsiklo, duag itom kag puti ang biktima padulong sa Brgy. Aflek Proper sang ginpapondo sang apat ka wala makilal-an nga mga kalalakihan kag gintiro sang makapila ka beses nga nangin tunaan sang iya hinali nga kamatayon.
Gilayon naman nga nagpalagyo ang mga suspek matapos nga nakomiter ang krimen.
Narekober sa crime scene ang anum ka basiyo sang caliber .45.
Sa karon, ginahibalo pa sang kapulisan ang motibo sang pagpatay sa biktima.
Samtang, ginpahugtan naman ang mga comelec checkpoint kadungan sang nagahilapit nga eleksiyon.
