Nadakpan sa isa ka buy-bust operation ang duha ka persona lakip ang isa ka barangay kagawad, alas 10 sang gab-i, sa bahin sang Purok Ramos, barangay Santa Cruz, Siyudad sang Koronadal.
Suno sa insiyal nga imbestigasyon, target sang operasyon amo si alyas “Bibi”, 47-anyos, residente sang nasambit nga lugar.
Suno sa insiyal nga datos, nadakpan man si Kagawad Jove Jimenez, residente sang Purok Bagong Silang kag aktibo nga opisyal sang Barangay Santa Cruz.
Ginkumpirmar sang otoridad nga una na ini nga nadalahig sa paggamit sang illegal nga droga, apang ginpahayag nga nag-untat na siya antes pa man ini nga insidente.
Narekober sa duha ang tatlo ka pakete sang ginapatihan shabu, P500 nga marked money nga ginamit sa buy-bust, kag iban pa nga ebidensya.
Gilayon nga gindetain ang duha sa kustodiya sang kapulisan samtang nagapadayon ang imbestigasyon kag ang preparasyon sang kaso batok sa ila.
Padayon ang panawagan sang kapulisan sa publiko nga magkooperar kag magsuporta sa kampanya batok sa illegal nga droga.
