KORONADAL CITY – Ginbawian sang kabuhi ang mag-iloy samtang pilason naman ang padre de pamilya sang mga ini matapos nga mainvolbar sa isa ka vehicular accident sa Prk. Depita, Brgy. Zone 2, Koronadal City.
Ginkilala ang mga napatay nga kanday Honie Lasamana, 33 anyos, nagadala kag isa ka tuig nga bata nga lalaki sini.
Suno kay PSSgt. Leo Dimaculangan, imbestigador sang Koronadal PNP Traffic, gina-usoy sang tricycle nga ginamaneho Sarub Lasamana, 32 anyos, residente sang Brgy. Bunao, Tupi ang dalan padulong sa direksyon sang nasambit nga banwa sakay ang asawa sini nga si Honie kag ang ila bata.
![](https://img.bomboradyo.com/koronadal/2022/12/aksidente2.jpg)
Apang, pag-abot sa ginluntaran sang insidente hinali na lamang nagliko ang isa ka Isuzu pickup nga ginamaneho ni Erwin Aviadorpadulong sa pihak nga direksyon rason nga nagluntad ang head-on collision.
Nadala pa sa South Cotabato Provincial Hospital ang mga biktima apang gindeklarar nga dead on arrival sanday Honie kag 1 year old nga bata sini.
Dugang pa ni Dimaculangan, yara sa walo ka bulan nga nagadala si Honie sang maaksidente.
![](https://img.bomboradyo.com/koronadal/2022/12/aksidente.jpg)
Sa karon, padayon nga ginabulong sa hospital ang padre de pamilya bangud sa naangkon nga pilas sini sa nagkalain-lain nga bahin sang iya lawas.
![](https://img.bomboradyo.com/koronadal/2022/12/aksidente1.jpg)
Nagapadayon naman ang imbestigasyon sang Koronadal PNP traffic kun ano ang rason sang pag-arado sang pickup sa tricycle.