Nagpakita liwat sang aktibo ang Mt. Kanlaon gaina sang aga, matapos ma-rekord ang pagbuga sang abo halin sa crater sang bulkan halin 7:30 AM asta 7:42 AM, base sa time-lapse footage nga nakuha sang Kanlaon Volcano Observatory – Canlaon City (KVO-CC) gamit ang ila IP camera.
Suno sa report sang Philippine Institute of Volcanology and Seismology (PHIVOLCS), ang amo nga pagbuga nagtuga sang abo kag naglab-ot sa kataason nga 300 metros halin sa bibig sang bulkan. Kaangot sini, nagapabilin nga nakataas ang Alert Level 2 sa bulkan, nga nagakahulugan nga may padayon nga moderate level sang volcanic unrest.
Ginapahanumdom sang PHIVOLCS nga ang ini nga alert level isa ka indikasyon sang posible nga phreatic eruptions ukon hinali nga paglupok nga mahimo magresulta sa delikado sa mga yara sa palibot sang bulkan.
