Nag-isyu sang rules ukon pagsulundan ang Bangko Sentral ng Pilipinas (BSP) may kaangtanan sa merchant payment acceptance activities agud nga mas maproteheran ang funds sang merchants kag customers.
Paagi sa isa ka statement, ginpahayag sang BSP nga nag-isyu sila sang Circular No. 1198 ukon ang Regulatory Framework for Merchant Payment Acceptance Activities (MPAA) sang July 19, 2024.
Pahayag sang central bank, ang framework ang may tinutuyo nga magtukod sang standards kag best practices sa pagproteher sang customer funds kag kinamatarong sang mga merchant kun naga-deal sa operators of payment systems (OPS) nga naga-engage sa MPAA ukon mga serbisyo nga ginahatag sa merchants agud nga mabaton ang bayad sa baylo sang produkto kag serbisyo.
Dugang pa sang central bank nga ang merchant payments ang naglab-ot sa 64.9% ka digital transactions sang nagligad nga tuig. Angut sini, ginpasigurado sang BSP nga ang ila pinakabag-o nga framework nga OPS nga naga-engage sa MPAA ang nagaadoptar sang panggobyerno nga istruktura kag pagsulundan agud nga malikawan ang potensyal nga risgo sa ila nga negosyo.
Sa idalom sang nasambit nga circular, ang OPS engaged ukon ma-engage palang sa Merchant Acquisition ukon ang pagbaton kag process sang payment transaction sa ngalan sang merchant paagi sa agreement, ang dapat nga magkuha sang lisensya halin sa BSP.
Suno sa central bank, ang indi magsunod sa ila nga ginhatag nga requirement ang mahimo mangin subject sa enforement actions sa idalom sang National Payment Systems Act kag New Central Bank Act.
Ginpasalig man sang BSP nga padayon sila nga makig-angut sa payment industry agud mas mapasangkad ang enabling regulatory environment kag masigurado ang matawhay kag masaligan nga payment system.
