Lumagda ang Bangko Sentral ng Pilipinas (BSP) ng magkakahiwalay na information sharing agreements (ISAs) kasama ang National Bureau of Investigation (NBI), Cybercrime Investigation and Coordinating Center (CICC), at Securities and Exchange Commission (SEC).
Layunin ng mga kasunduang ito na pahintulutan ang legal o lawful na pagbabahagi ng kumpidensyal na impormasyon tungkol sa mga financial account upang masuportahan ang mga imbestigasyon laban sa mga scam at iba pang kaugnay na paglabag sa batas.
Kinatawan ni BSP Governor Eli Remolona Jr. si BSP General Counsel Roberto L. Figueroa sa paglagda ng mga kasunduan na ginanap sa BSP Head Office sa Maynila noong Pebrero 20, 2026. Dumalo rin sa seremonya sina NBI Acting Director Angelito DLP. Magno, CICC Executive Director Renato A. Paraiso, at SEC Chairperson Francisco ED. Lim.
Sa kanyang mensahe, iginiit ni Figueroa na ang tunay na hamon ay nasa pagpapatupad ng kasunduan: ang tagumpay nito ay hindi masusukat sa mismong dokumento, kundi sa maayos na implementasyon—sa mas pinalakas na imbestigasyon, mga kasong nareresolba, mga panganib na nababawasan, at pinsalang naiiwasan.
Samantala, tiniyak ni Deputy Governor at AFASA Technical Working Group Adviser Elmore O. Capule ang patuloy na pakikipagtulungan ng BSP sa CICC, NBI, at SEC upang matiyak na ang Anti-Financial Account Scamming Act (AFASA) ay maipatutupad nang may disiplina, integridad, at mahigpit na pagsunod sa batas.
Nakasaad sa mga ISA ang malinaw na proseso para sa pagkuha at pag-secure ng impormasyon mula sa Consumer Account Protection Office ng BSP hinggil sa mga financial account na sangkot sa scam, alinsunod sa AFASA at sa mga implementing rules nito sa ilalim ng BSP Circular 1214.
Sa pamamagitan ng mga kasunduang ito, mapapalakas ang kakayahan ng NBI at CICC sa pagbuo ng mga kaso laban sa mga lumalabag sa AFASA. Magbibigay-daan din ito sa SEC na makakuha ng mahahalagang impormasyon para sa kanilang regulatory mandate, kabilang ang pagresolba ng mga reklamo ng financial consumers.
Sa kabuuan, pinatitibay ng mga ISA ang ugnayan at koordinasyon ng iba’t ibang ahensya laban sa financial account scams, pinahuhusay ang kakayahan sa imbestigasyon laban sa cyber-enabled fraud, at pinagtitibay ang sama-samang pagsisikap ng pamahalaan na maprotektahan ang publiko laban sa mga krimeng pinansyal.
