KORONADAL CITY- Gin-anunsyo ni British Prime Minister Liz Truss ang iya resignation apisar anum ka semana pa lang ang iya nga kalawigon sa pagpungko sa pwesto.
Ini ang ginpahayag ni Ramil Isogon, Bombo International Correspondent to United Kingdom sa interbyu sang Bombo Radyo Koronadal.
Suno sa iya, natabo ini kasunod sang high level resignations kag nagadamo na nga numero sang Conservative members sang parliament nga nagapanawagan nga maghalin na siya sa amo nga posisyon.
Sa 45 ka adlaw nga pagpabilin sini bilang prime minister, napun-an ang iya liderato sang ginamo sa “mini-budget” kag away sa pulitika kag ekonomiya.
Madumduman nga Septyembre 6 lang sang gin-appoint ni Queen Elizabeth II si Truss. Siya subong ang ginakilala nga shortest-serving prime minister sa maragtas sang Britanya. Ang una nagauyat sini nga rekord amo si George Canning nga naglawig sang 119 days sa early 19th century.
Suno kay Bombo Ramil , ginahikot na subong ang leadership contest agud maka-desisyon kun sin-o ang masunod nga lider sang ruling Conservative Party nga amo man ang mangin masunod nga prime minister.
Lakip sa mga matunog nga pangalan nga nagaguwa nga magabulos kay Truss amo sanday Rishi Sunak ukon ang former finance minister nga nangin kasumpong man ni Truss sa nagligad nga Conservative Party leadership race.
Yara man ang pangalan sang 58-anyos nga si former Prime Minister Boris Johnson nga nag-resign man subong nga tuig bangud nadulaan ini sang kredibilidad bangud sa natabo nga political scandal.
Sa subong, magapabilin si Truss nga caretaker prime minister samtang wala pa nahingadlan ang iya nga successor. Ang magabulos sa iya amo ang mangin ika-lima nga Conservative prime minister sa sulod lang sang anum ka tuig kag ikatatlo sa sulod lang sang sini nga parliamentary term.
Posible nga sa Oktubre 28 matapos ang patigayunon nga leadership contest.
