KORONADAL CITY- Liwat na naman nga pasidunggan ang Bombo Radyo Koronadal halin sa Philippine Red Cross South Cotabato Chapter kag Department of Health bangud sa dako nga nabulig sini agud makatipon sang madamo nga dugo para sa mga nagapanginahanglan sang bulig.
Nahibaluan nga ginpangunahan nanday Dr. Ervin Luntao, chairman of the Board of Directors sang PRC South Cotabato kag Erwin Rommel Del Carmen, Chapter Administrator sang PRC South Cotabato ang paghatag sang pasidungog sa mga outstanding public kag private institutions sa probinsya sang South Cotabato sa Blood Donation Program.
Nagpanguna ang Bombo Radyo Koronadal sa private sector sa may pinakamadamo nga nakontribwer nga dugo pinaagi sang tuigan nga Dugong Bombo nga may tinutuyo nga masalbar kag madugtungan ang kabuhi sang mga nagapanginahanglan.
Ang nasambit nga pasidungog ang kadungan sang Blood Donors Celebration and Recognition Ceremony nga kasamtangan nga ginapatigayon sa syudad subong nga udto.
