KORONADAL CITY – Nagserbe nga taytay ang Bombo Radyo Koronadal agud makaistorya ni Motmot Demerin Dioso sa iya pamilya samtang naka-quarantine ini sa pungsod Kuwait.
Madumdoman nga una na nga nalatnan sang coronavirus disease si Dioso kag madamo ang nakigsimpatiya sa iya kag nagbubo ang mga well-wishers nga mga netizen nga tigayon nga mag-ayo ang iya kahimtangan.
Sa eksklusibo nga interbyu sang Bombo Radyo Koronadal kay Motmot, dako ang iya pasalamat nga nangin taytay ang waragwagan agud nga maka-contact ini sa iya pamilya.
Padayon man ang pag-ayo sang iya pamatyag bangud sa medikasyon nga ginahimo kag ang suporta halin sa iya nga mga kasimanwa.
Suno sa iya, nakahanda man ang iya ahensiya nga papulion siya diri sa Pilipinas sa tion nga mag-ayo na ang iya pamatyag.
Magluwas sini, kasubong nga nangin reunion ang natabo kay Motmot kag iya nga utod nga agot nga si Shiela kag iloy nga si Sonya.
Diri nagkamustahanay ang magpamilya kag nagbaylohanay sang mga tinaga sang pagpabaskog sang boot labi na para kay Motmot.
Nagpasalamat man ang nasambit nga OFW sa tanan nga mga netizens kag mga himata niya nga naghatag sa iya sang inspirasyon agud magpakigbato batok sa iya ginabatyag.
Ginalauman nga karon sa hapon oras sa Pakistan pagakuhaan sang swab test si Dioso agud mahibaloan kun positibo ukon negatibo ini sa covid-19.
