POLOMOLOK, SOUTH COTABATO – Boluntaryo nga nagsungka sa Polomolok PNP ang isa ka convicted prisoner nga nahilway bangud sa Good Conduct Time Allowance (GCTA) matapos ang ultimatum nga ginhatag ni Pangulong Rodrigo Duterte.
Ini ang ginkumpirmar ni Pol. Lt. Col. Joven Bagaygay, hepe sang Polomolok PNP sa interbyu sang Bombo Radyo Koronadal.
Ginkilala ang nagsungka nga si Jose G. Noque, 62 anyos nga residente sang Tboli, South Cotabato kag temporaryo nga nagapuyo sa bata sini sa Purok Pag-asa, Barangay Magsaysay, Polomolok, South Cotabato.
Suno kay Bagaygay, nahadlok si Noque sa mandu ni Pangulong Duterte nga shoot to kill sa tanan nga mga convicted criminal nga nahilway sa prisuhan bangud sa GCTA rason nga nagsurender ini sa kapulisan.
Nahibaluan nga nahilway gikan sa Iwahig Penal Colony, Puerto Prinsesa, Palawan si Noque matapos mapamatbatan nga guilty bangud sa kaso nga rape sang Mayo 5 1990.
