KORONADAL CITY– Tigayon na nga ginbawian sang kabuhi ang 12-anyos nga si Dave Ayupan nga kasamtangan nga naka-ICU sa Southern Philippines Medical Center sa siyudad sang Davao.
Ini ang ginkumpirmar sang MDRRMO-Surallah sa interbyu sang Bombo Radyo Koronadal.
Kaina sang kaagahon suno pa sang tigayon nga napatay ang bata nga kalakip sa 34 ka mga pasahero sang forward truck nga nadulaan sang brake kag nahulog sa pil-as sa Barangay Lamsalome, Tboli, South Cotabato sang tinalikdan nga Setyembre 17, 2019.
Madumduman nga si Dave na lamang ang nabilin sa 4 sila nga magpamilya bangud dead on the spot sa aksidente ang amay, iloy kag utod sini.
Una naman nga nareport nga napatay na sa sulod sang 2 ka oras si Dave apang narevive ini sang mga doktor.
Sa subong, nagsaka na sa 21 ang patay sa maduguon nga aksidente sa dalanon.
