KORONADAL CITY – Tuman nga ginkalipay ni Bombo Radyo Philippines assistant vice president Genel Demorito ang madinalag-on nga paghiwat sang Bombo Music Festival 2019 nga ginpatigayon sa Rose Memorial Auditorium sa Central Philippine University sa Jaro, Iloilo City sadtong Sabado sang gab-I.
Sa interbyu sang Bombo Radyo Koronadal, ginpahayag sang opisyal nga malipayon siya sa nangin dalagan sang Bombo Music Festival.
Para kay Demorito, makabig nga isa ka alas ang nasambit nga songwriting competition agud mapabaskog pa ang musikang Pilipinhon ilabi na ang mga Hiligaynon songs.
Nagalaum man ini nga magapadayon ang nasambit nga proyekto sa madason pa nga mga tinuig.
Samtang ginaagda man sini ang mga talentado nga composers kag interpreters diri sa probinsya nga mag-intra sa nasambit nga kompetisyon sa madason nga tuig.
Ginkoronahan nga kampeon ang Visayan song nga “Ngano” ni LJ Manzano; 1st runner-up naman ang “Bagyo” ni Gian Carlo Torres, kag 2nd runnerup naman ang “Mahal Ka ng Mahal Ko” ni Regine Tok.
