KORONADAL CITY- Nagapadayon sa karon ang imbestigasyon sang mga otoridad sa nagluntad nga panibag-o naman nga pagpamomba sa banwa sang Isulan, Sultanm Kudarat subong nga aga.
Suno naman kay Bombo Correspondent Larry Geronio, nagluntad ang pagsigabong sa Isulan Public Market sa Brgy. Kalawag 3 sa atubang mismo sang isa ka Bakeshoppe pasado alas 7 subong nga aga.
Gintanom ang nasambit nga bomba malapit sa parking area sang mga motorsiklo.
Sa inisyal nga imbestigasyon, isa ka mabaskog nga sahi sang improvised explosive device ang nagsigabong kun sa diin sa inisyal nga report, 8 ang napagkit nga pilason kun sa diin pila sa mga ini ginalakipan nanday:
1.) Niño Virgo, 28, vendor, Brgy, Sampao, Isulan, SulKud
2.) Jaren Amigo, 24 laborer, Prk5. Brgy. Biwang, Bagumbayan, SulKud
3.) Jay Carnaso, 30 butcher, Brgy. Dansuli, Isulan, SulKud
4.) Jomar Aquino, 31 CAFGU member, Isulan Sulkud
5.) Gerald Cartagena, 28 baker, Brgy. Little Baguio, Surallah, SoCot
6.) Nasim Gulano, 25, businessman, Brgy. Kalawag I,Isulan, SulKud
7.) Terencio Cagadas, 35, Traffic Enforcer, Brgy. Kalawag II Isulan, SulKud
8.) Leonor Espeda, Market Guard, Isulan SulKud
Ginkordon naman sang Explosive Ordnance Disposal Team sang Sultan Kudarat kag Isulan PNP ang area bangud sa ginapatihan nga may yara pa sang isa ka bomba nga posible magsigabong.
Sa karon wala pa sang may natumod nga grupo ukon indibiwal nga yara sa likod sang pasigabong.
Madumduman nga sang nakaligad nga mga adlaw ginpatigayon ang komemorasyon sa asud-asod nga pagsigabong sa Isulan nga nagluntad man sang nakaligad nga tuig.
