KORONADAL CITY- Ginpataas pa ang alerto kag mas ginpahugtan ang seguridad sa syudad sang Cotabato mangin man sa probisnya sang Maguindanao makaligad ang panibag-o nga engwentro sa tunga sang militar kag sang isa ka ginapatihan nga bomb courier sa boundary sang Cotabato City kag probinsya sang Maguindanao.
Sa ekslusibo nga interbyu sang Bombo Radyo Koronadal kay 6th Infantry Division spokesperson major Arvin Encinas, napunggan nila nga makasulod sa Cotabato City ang isa ka ginapatihan nga miyembro sang BIFF-ISIS inspired group samtang sakay ang suspek sang iya nga motorsiklo.
Gilayon suno pa nga nagbunot sang armas ang wala pa ginhingadlan nga suspek kag nakigbaslanay sang lupok sa mga otoridad kun sa diin napatay man ini sa ulihi.
Narekober sa posisyon sang suspek ang isa ka cal. 45 nga armas luthang kag isa ka Improvised Explosive Device nga paga-usaron kun tani sini agud liwat pasigabungan ang syudad sang Cotabato.
Sa karun wala pa sang himata ang nagpadulong agud i claim ang bangkay sang nasambit nga suspek.
