Gin-anunsyo ni Philippine National Police (PNP) Spokesperson PBGen. Randulf Tuaño nga indi pagpunggan sang ahensya ang mga miyembro sini nga luyag magtestigo sa International Criminal Court (ICC) angut sa war on drugs ni anay Presidente Rodrigo Duterte.
Kasunod ini sang panawagan sang Prosecutor Office sang ICC sang mga direkta nga testigo halin sa PNP, Philippine Drug Enforcement Agency (PDEA) kag National Bureau of Investigation (NBI) angut sa mga natabo sa panahon sang kampanya kontra droga.
Gin-athag ni Tuaño nga panawagan lang ini sang ICC kag indi summon sa diin ginhingyo ang boluntaryo nga kooperasyon sang mga nasambit nga ahensya.
Suno pa kay Tuaño, nga kon luyag sang isa ka myembro nga magtestigo, dapat ini nga mangin isa ka personal legal decision.
Angut sini, ginakilala naman kag ginarespeto sang PNP ang due process kag legal nga kinamatarong sang mga myembro nga luyag magsabat sa panawagan sang ICC.
