KORONADAL CITY – Nagapadayon pa ang imbestigasyon sang BFP-Tacurong City sa nagluntad nga sunog sa Dragon Mart convenience store nga nahamtang sa national highway, Barangay New Isabela ala-1:20 kaina sang hapon.
Sandig sa report, namutikan na lamang sang mga empleyado sang Dragon Mart nga may madamol nga aso nga naguwa sa bodega sang nasambit nga convenience store.
Madasig suno pa nga nagdako ang kalayo kag maayo na lamang nga maabtik man ang pagresponder sang mga bombero agud nga mapatay ang kalayo.
Kalakip sa mga nagresponder sa lugar ang mga katapu sang Tacurong City Red Cross Volunteers.
Sa subong, ginahibalo pa ang kabug-usan nga damyos nga ginbilin sang sunog.
Madumduman nga ang nasambit nga convenience store ang ginpalukpan sang bomba sang nagligad nga bulan sang mga ginapatihan myembro sang MILF nga gilayon naman nga naarestar sang mga otoridad kag ginpasakaan na sang kaso.
