Nakit-an ang mga miyembro sang ginhimo nga search team ang black box sang Azerbaijan Airlines flight J2-8243, ang passenger plane nga nagtabisuok sa syudad sang Aktau sa Kazakhstan.
Ang black box ang isa nga plane device nga naga-unod sang mga impormasyon angot sa flight, airspeed, altitude, oras sang biyhae, kag iban pa nga importante nga impormasyon angot sa biyahe sang mga eroplano.
Suno kay Kazakhstan Deputy Prime Minister Kanat Bozumbayev, isa nga komisyon na ang ginhimo agud umpisahan ang imbestigasyon sa plane crash.
Magabulig man ang nasambit nga komisyon sa pamilya sang mga nasambit nga pasahero, kaupod na ang mga nakaluwas.
Suno pa kay Bozumbayev, nakaprerar ang nasambit komisyon kag ang gobyerno sang Kazakhstan sa pagbuliganay sa mga Azerbaijan authorities nga ginalauman man nga magahimo sang sarili nga imbestigasyon angot sa insidente.
Sa karon, nakuha na ang tanan nga bangkay halin sa crash site.
Base sa opisyal nga datus sang Kazakhstan, 29 nga katao ang kumpirmado nga nakaluwas, duha sa mga ini ang mga bata.
Naglab-ot man sa 38 katawo ang kumpirmado nga patay.
