Ginpasalig sang Bureau of Immigration (BI) ang Senado nga handa sila nga mag-file sang kaso batuk sa ila mga personnel nga mapamatud-an nga nagbulig kay dismiss Bamban, Tarlac mayor Alice Guo nga makagguwa sa pungsod.
Sa ginpatigayon nga Senate committee hearing sa ginaalegar illegal activities sang Philippine Offshore Gaming Operators (POGOs), ginpahayag ni BI Intelligence Division chief Fortunato Manahan Jr. nga indi pa niya matumod kon may BI personnel nga nalakip sa pagpalagyo ni Guo.
Ang isyu ang liwat nga nadiskusyonan matapos nga gintumod ni Senator Joel Villanueva ang posibilidad sa pagtuhaw sang “POGO-sponsored” government officials kalakip na ang Presidente sang Pilipinas.
Ginsabat naman ini ni Manahan nga handa ang BI nga pasakaan sang kaso kon mapamatud-an nga may kaangtanan ang bisan sin-o nga myembro sang ahensya.
Apang suno sa chair of the Senate committee on women, children, family relations and gender equality, Senator Risa Hontiveros, nga magluwas sa pagpasaka sang kaso batuk sa mga nagbulig kay Guo, kinahanglan man magtinguha sang BI agud nga mahilway ang ila ahensya sa mga corrupt nga personalidad.
