KORONADAL CITY – Yara na sa kustodiya sang mga otoridad ang isa ka lider sang bigtime nga drug syndicate sa Maguindanao makaligad nga maaresto sang PDEA-BARMM sa ginpatigayon nga entrapment operation.
Ginkilala ni PDEA-BARMM Director Juvenal Azurin ang na-arestar nga suspek nga si Sahid Talib, yara sa legal nga edad kag residente sang Datu Odin Sinsuat, Maguindanao.
Suno kay Azurin, kaupod nga nakumpiskar kay Talib ang yara sa P6.8 million nga kantidad sang ginapatihan nga shabu.
Nahibaluan nga madugay na nga ginasubay-bayan ang suspek bangud sa pag-usar sang sini sang mga menor de edad sa pagbaligya sang iligal nga droga.
Narekober mismo kay Talib ang masobra isa ka kilo nga shabu nga ginhatag sini sa PDEA agent nga nagapakilala nga buyer sang droga.
Madumduman nga ang pagka-arestar sa suspek ang kasunod sang pagka-arestar sa 3 ka mga babaye nga imbolbado sa large scale trafficking sang droga sa Maguindanao.
Sa karon, natalana nga pasakaan sang kaso ang kaso ang nasambit nga suspek.
