KORONADAL CITY – Nagpaandam ang Bangsamoro Islamic Freedom Fighters ukon BIFF nga magapadayon ang ila pagahimuon nga pag-atake sa pihak sang Holy Month of Ramadan.
Suno kay BIFF Spokesman Abu Misry Mama indi sila magpangduha-duha nga magapatigayon sang offensive attack batuk sa hubon sang gobyerno sa oras nga makaatubang ang mga suldado kag maunahan sila.
Apang, ginpanginwala ni Mama ang report nga sila ang una nga nag-atake sa Maguindanao Police Provincial Office sang nagligad nga adlaw bangud ang hubon sang gobyerno ang una nga nagpalupok.
Madumduman nga pila ka minuto man ang natabo nga pagkambyuhanay sang lupok sa tunga sang mga katapu sang BIFF kag kapulisan nga nagresulta sa pagkapilas sang isa ka 70-anyos nga sibilyan nga ginkilala kay Uwak Laban.
Kaangot sini, nakaalerto sa subong ang Maguindanao PNP kag militar sa lugar agud nga mapunggan ang BIFF sa ila nga plano nga pag-atake subong nga Ramadan.
