KORONADAL CITY- Emosyonal nga nagpanawagan ang iloy sanag 7 anyos nga bata nga si Devey shane Alayon nga napatay sa nagluntad nga pagsigabong sa Isulan, Sultan Kudarat.
Sa ekslusibo nga interbyu sang Bombo Radyo Koronadal kay Gng. Niza Alayon indi sini mabaton-baton ang kamatayon sang nagaisahanon sini nga bata nga si Devey sa makangilidlis nga insidente kagab-i kun sa diin malipayon pa sila nga nagpamakal sang ukay-ukay kag sa hinali nga tion lamang napatay ang inosente sini nga bata.
Dugang pa sini nga gindangat pa sa balay bululngan si Devey kag nagpangita pa sang dugo nga igatughong sa iya nga bata si Niza apang wala na nasarangan pa sang iya bata ang malala nga pilas nga naangkon sa iya nga gilid kag ginbawian sang kabuhi.
Nagatalangison nga nagpanawagan ini sa mga suspek sa likod sang pagpasigabong nga magsungka na agud mahatagan sang hustisya ang iya nga bata.
Samtang sa pihak nga bahin nagpain naman sang yara sa P1 million nga reward money si Sultan Kudarat Gov. Pax Mangudadatu nga amuh man ang kasamtangan nga Regional Peace and Order Council chairman sa rehiyon 12 agud madakpan ang mga suspek kun sa diin hugot sini nga ginkondinar ang paghitabo.
Kaangot sini sa interbyu man sang Bombo Radyo Koronadal kay 6th Infatry Division Spokesperson Army Captain Arvin Encinas ginatudlo nga yara sa likod sang pagpasigabon amuh ang BIFF-ISIS inspired group sa pagpamuno sang isa ka Kumander Bungot kun sa diin nakabaton suno pa sang impormasyon ang militar nga may igapatigayon nga terror attack ang grupo apang wala matumod kun sa diin partikular nga lugar sa rehiyon 12.
Madumduman nga nagbilin sang 2 ka patay samtang masobra 30 naman ang pilason sa nagluntad nga pagpasigabong.
