KORONADAL CITY – Padayon sa subong ang paglagas sang militar batok sa mga miyembro sang Bangsamoro Islamic Freedom Fighters (BIFF) nga amo ang ginatudlo nga yara sa likod sang panibag-o nga pagsigabong sa probinsya sang Maguindanao.
Ini makaligad nagsigabong ang isa ka granada malapit sa isa ka simbahan sa Brgy. Poblacion sa banwa sang Datu Piang kag maswerte nga wala sang napatay ukon napilasan.
Suno kay Western Mindanao Command spokesman Major Arvin Encinas sa interbyu sang Bombo Radyo Koronadal, ila na nga ginahibalo ang identity sang duha ka tawo nga naghaboy sang granada kag nagpalagyo sakay sang motorsiklo.
Ginahibalo man sang mga otoridad ang posible nga motibo sa nasambit nga insidente.
Samtang mas ginpahugtan man ang seguridad sa nasambit nga probinsya batok sa retaliatory attacks sang BIFF makaligad ang engkwentro nila sa MILF.
Nagapati man ang Wesmincom spokesperson nga amat-amat na nga nagahuyang ang pwersa sang BIFF bangud sa pagkaarestar sa pila ka foreign terrorists nga nagasuporta sa ila kag padayon man sa operasyon sang militar.
