Ginmandu ni Bureau of Immigration Commissioner Joel Viado ang madasig nga pagkakas sa mga personnel sang BI matapos nga makapalagyo ang high-profile nga Korean nga pugante.
Base sa nakuha nga bag-o nga CCTV footage kag mga testimonial nga ebidensya, posible nga may sabwatan nga natabo.
Sa isa ka statement, ginpahayag ni Comm. Viado nga indi ini basta-basta nga kapabayaan lang kay nakuha sa camera ang mga hulag kag interaction nga nagapakita sang sabwatan.
Magluwas pa diri, nakalap man sila sang dugang nga testimonial nga ebidensya nga magapabakod pa sa ila kaso batok sa mga personnel nga apektado.
Nagapadayon pa ang imbestigasyon subong, bisan pa may ara na sila sang malig-on nga ebidensya nga magsuporta sa mga criminal cases batok sa mga responsable sa insidente.
Sa subong, ginaproseso pa ang CCTV footage nga nagapakita sang pagtulong sang mga BI officers sa nagpalagyo nga pugante.
Samtang, napasaka na ang mga criminal complaints batok sa mga BI personnel sa Department of Justice.
Nagpromisa man ang BI chief nga indi magapundo ang ahensya kag wala sang palampason nga bisan sino, hasta nga mapanabat kag mapreso ang tanan nga responsable agud indi nila ini pag-usaron nga pamaagi.
