MAKILALA, NORTH COTABATO– Nagpatigayon sang delikado nga salvaging procedure ang Bureau of Fire Protection sang Makilala, North Cotabato agud marekober kag masalbar ang mga importante nga mga dokumento sang Municipal Government sang nasambit nga banwa.
Sa interbyu sang Bombo Radyo Koronadal kay Bombo Correspondent Larry Geronio, ginakabug-usan sang 40 miyembro sang BFP ang nagapatigayon sang salvaging procedure sa naguba nga Municipal Hall sang Makilala kun sa diin target sang mga ini nga makuha ang mga dokumento nga nabilin sa sulod sang munisipyo.
Nagasulod ang mga katapo sang BFP sa sulod sang guba nga munisipyo kada lima ka minuto agud kuhaon ang mga dokumento kag gilayon man nga naga gawas bangud sa posibilidad nga magtiphag ang edifisyo ilabi na kag padayon ang mga pagtay-og sa lugar.
Sa kada 5 ka minuto, tig 15 ka mga katapo sang BFP ang nagasulod agud magpatigayon sang salvaging procedure.
Nahibaluan nga ang munisipyo sang Makilala ang isa sa mga nakapagkit sang tuman nga kagub-anan makaligad ang asud-asod nga linog sang nakaligad nga bulan sang Oktubre.
