KORONADAL CITY – Pagaatubangon sa palaabuton nga Barangay kag Sangguniang Kabataan (SK) eleksiyon sa Mayo sang bata sang ginpatay nga Barangay Chairman sa siyudad sang Koronadal ang prime suspek sa pagpatay sa amay sini.
Ini makaligad nga pormal na nga nagsang-at sang iya nga Certificate of Candidacy si Ma. Angelica Bermil, bata ni Ex-Brgy. Chairman Baltazar Bermil nga ginpatay sang riding in tandem sang Agosto 9, 2017.
Una diri, nagfile naman sang iya nga COC si incumbent Barangay Kagawad Ricarido Ayoyon Jr. nga amo man ang ginatudlo nga utok sa pagpatay kay Bermil base sa mga nagatindog nga testigo.
Nahibaluan nga si Ayoyon ang anay man nga nagserbe sang 3 ka termina sa Barangay Topland, Koronadal City kag amo man ang gintal-usan ni Bermil sang nagligad nga eleksiyon.
Sa subong, nagaangatubang pa sang kaso si Ayoyon apang pursigido ini nga magpapili nga punong barangay sa ila nga lugar.
Ang nasambit nga barangay sa siyudad ang isa sa mga ginamonitor sang kapulisan nga may mainit nga political rivalry.
