KORONADAL CITY – Nagpalab-ot sang pagpasalamat sa Bombo Radyo Koronadal ang isa ka bata nga wala makita ang amay sa sulod sang halos 30 ka tuig bangud nakaangkon ini sang paglaum nga Makita ini.
Sa eksklusibo nga interbyu sang Bombo Radyo Koronadal kay Carl Roger Pesaje, 29 anyos kag residente sang Iloilo City, ginpahayag sini nga nakig-angot na siya sa iya mga himata sa Alamada, North Cotabato kun diin didto nagapuyo ang iya amay nga si June Monico.
Suno kay Carl, gintawgan niya ang numero sang telepono nga ginhatag sang Bombo agud nga maistorya ang amay sini kag nakumpirmar niya nga ang Monico nga tag-iya sang kilala nga shop sa Barangay Kitacubong ang ginapangita niya matapos nga naistorya sini ang iya nga lolo.
Apang, dismayado lamang siya bangud wala pa niya maistorya ang amay bangud wala ginhatag sang asawa sini ang telepono kag daw kasubong nga ginalikawan siya.
Sa subong, nagapanawagan si Carl sa asawa sang amay sini nga pahanugutan siya nga makita ini bangud madugay na niya nga luyag mahakos.
Nahibaluan nga nagdako sa iya nga lolo kag lola si Carl bangud nga ginbayaan man sang iya iloy matapos nga mag-abroad.
Si Carl ang nainterbyu sang Bombo Radyo Koronadal sang Lunes kun diin nagpanawagan ini sa iyia amay.
Paagi man sa facebook page sang Bombo Radyo Koronadal, na-trace ang iya amay matapos nga may naghatag sang numero sini ang mga nakakilala sa iya.
