Ginreport sang China Coast Guard nga nagbungguanay ang barko sang Pilipinas kag China sa Ayungin shoal nga isa ka submerged reef sa Spratly Islands sa West Philippine Sea subong nga adlaw sang Lunes, Hunyo 17, 2024.
Sa ginpaguwa nga statement sang Chinese Coast Guard, ginbalewala sang resupply ship sang Pilipinas ang madamo nga beses nga pagpaandam gikan sa China.
Gin-akusaran man sini ang barko sang PH nga nagpalapit sa unprofessional nga paagi nga nagresulta sa pagbungguanay.
Ginpasibangdan man sang CCG ang barko sang PH nga ilegal nga nagsulod sa kadagatan nga malapit sa Ayungin shoal sa Spratly Islands.
Saad pa sang CCG nga nagpatigayon ini sang control measures batuk sa barko sang PH suno sa layi.
Sa subong, wala pa sang may ginpaguwa nga pahayag ang bahin sang PH angot sa pinakabag-o nga insidente sa Ayungin shoal sa WPS nga sakop man sang exclusive economic zone sang aton nga pungsod.
