KORONADAL CITY- Ginpaidalum sa state of calamity ang 2 ka barangay sa banwa sang Surallah ,South Cotabato bangud sa cholera outbreak.
Ini ang nangin pahayag ni Barangay Kagawad Roger Maguad, chairman ng committee on Health sa interview sang Bombo Radyo Koronadal.
Suno sa opisyal, tuman ka nangin apektado nga mga lugar sang nasambit nga barangay amu ang Sitio Villa Ellaga kag Sitio Basak sang Barangay Colungolo sa diin 7 ka pamilya ang naospital bangud sa pagpalanakit sang ila nga tiyan, pagpalamuka kag pagpamuhin.
Suno pa sa opisyal, naguwa sa assessment kag validation sang Municipal Disaster and Management Office in partnership kag Municipal Health Office kag BLGU-Colongulo nakita nga may ara sang leak ang pipeline sang water system nga gina-agyan sang ginakuhaan sang tubig nga mainom sang mga residente sa lugar.
Madasig naman nga ginpaidalom sa testing ang tubig bangud sa posibilidad sang contamination kabangdanan nga nakabatyag sang pagpalanakit sang tiyan kag iban pa nga mga sintomas sa cholera ang mga residente sa lugar.
Kaangot sini, nagpaghatag man sang limpyo kag potable nga tubig sa mga mga residente nga apektado ang LGU.
Nakig-angot man ang isa ka water supplier sa BLGU para matagaan sang malimpyo nga tubig nga mainom ang mga residente para indi na maglala pa sang sitwasyon sa nasambit nga lugar.
