KORONADAL CITY – Ginpaidalom na sa state of calamity ang isa ka barangay sa banwa sang Surallah, South Cotabato nga nangin apektado sang pagpanalasa sang mabaskog nga hangin kag ulan.
Ini ang ginkumpirma ni Barangay Chairman Rizalito Ello sang Barangay Colonggulo sa interview sang Bombo Radyo Koronadal.
Suno kay Barangay Chairman Ello, sa ila nga barangay yara sa masobra 30 ang naguba nga panimalay matapos nga ginlupad sang hangin ang mga atup kun diin ang iban sa mga ini totally damaged kag indi na maistaran pa.
Magluwas sini, ginpahapa man sang mabaskog nga hangin ang ekta-ektarya nga pananum nga mais, mga prutas kag puno sang kahoy sa ila nga barangay.
Samtang, may masobra 20 ka mga panimalay man ang ginguba sang hangin sa barangay Moloy nga kaiping nga barangay lamang sang Colonggulo.
Kaangot sini, gilayon nga nagpanghatag ang Provincial Disaster Risk Reduction and Management Council (PDRRMO) South Cotabato sang bulig sa mga pamilya nga naapektuhan kasubong sang mga hygiene kits, sleeping kits kag foodpacks.
Sa subong, nagapadayon ang damage assessment sa nasambit nga mga barangay kag ginahibalo ang kabug-usan nga damyos nga ginbilin sang kalamidad.
Ginpasiguro naman sang local government unit (LGU) sang Surallah, South Cotabato sa pagpanguna ni Mayor Pedro Matinong nga may nakapain nga pundo para sa mga pamilya nga apektado.
