KORONADAL CITY -Hustisya ang ginasinggitan sa karon sang pamilya sang Barangay Kapitan matapos nga ginluthang patray ini sa Barangay Basak, Lebak, Sultan Kudarat.
Sa interview sang Bombo Radyo Koronadal kay P/LtCol. Julius Malcontento, hepe sang Lebak MPS, habang nagatindog sa guwa sang iya tindahan si Brgy. kapitan Rogelio “Tentoy” Talagtag Jr, 53 anyos, ginpalapitan ini sang isa ka armado kag ginluthang sang makapila ka beses.
Gilayon naman nga nagpalagyo ang suspek sakay sang motorsiklo sa wala mahibaluan nga direksiyon.
Nag-angkon naman sang igo sang bala sa ulo kag lawas ang biktima nga gintunaan sang kamatayon sini.
Naguwa man sa post mortem examination nga 8 ka bala sang caliber 45 ang nag-igo sa nagkalain-lain nga bahin sang lawas sang biktima nga gintunaan sang kamatayon sini.
Nakarekober naman ang slug kag basiyo sang bala sa crime scene.
Sa subong, indi pa matumod ang motibo sang krimen kag ginahibalo pa kun sin-o ang may kahimuan sang krimen.
Apang, may mga persons of interest na ang mga kapulisan sa posibel may kahimuan sa pagpatay sa opisyal.
Nakuha man sang mga ini ang kopya sang CCTV footage sa insidente.
