POLOMOLOK, SOUTH COTABATO – Nagapadayon ang imbestigasyon sang kapulisan sa nagluntad nga insidente sang pagpangluthang sa Brgy. Koronadal Proper sa banwa sang Polomolok, South Cotabato.
Sa interbyu sang Bombo Radyo Koronadal, ginkilala ni Polomolok PNP deputy chief of police Capt. Rommel Hitalia ang biktima nga si Brgy. Kagawad Emman Macabangin, samtang ginahibalo pa ang pangalan sang kaupod sini nga barangay peacekeeping action (BPAT).
Base sa inisyal nga imbestigasyon, hinali nga ginpaulanan sang bala ang mga biktima sang ginapatihan nga riding in tandem samtang nagabantay ang mga ini sa outpost.
Tigayon naman nga nagpalagyo ang mga suspek sa dalan pakadto sa Brgy. Sulit makaligad ginhimo ang krimen.
Dead on the spot si barangay kagawad Macabangin samtang kritikal naman ang barangay tanod bangud sa nagkalain-lain nga igo sa iya lawas.
Personal grudge naman ang ginalantaw nga motibo sang mga kapulisan sa nasambit nga pagpangluthang.
Nahibaloan nga nakaluwas man sadto si kagawad Macabangin sa strafing incident sa iya panimalay.
Kun madumdoman, ang barangay Koronadal Proper ang lugar nga ginkapatyan sang duha ka pulis samtang nagapatigayon sang pagpatrolya.
