KORONADAL CITY – Patay ang isa ka barangay kagawad samtang pilason naman ang misis sini sa nagluntad nga pagpangluthang sa banwa sang Polomolok, South Cotabato.
Ginkilala ang napatay nga biktima nga si barangay kagawad Dima Macaludos, samtang ang asawa naman sini amo si Pohania Macaludos, 42 anyos, kag lunsay residente sang Brgy Lumakil.
Base sa inisyal nga imbestigasyon, halin ang mga biktima sa Polomolok public market kag sang nag-abot sa Prk. Pagasa sa nasambit nga barangay, ginluthang ang mga ini sang mga ginapatihan nga riding in tandem suspects.
Naigo si Dima sa iya ulo kag likod kun sa diin ginhingagaw pa ini sa ospital apang gindeklarar nga dead on arrival, samtang yara sa luwas nga kondisyon si Pohania makaligad maigo lamang sa batiis.
Narekober sa crime scene ang pila ka basyo sang bala sang kalibre 45.
Sa interbyu sang Bombo Radyo kay South Cotabato police provincial director PSSupt Joel Limson, posible nga may kaanganan sa obra ang pagpatay kay Macaludos.
Sa subong may mga persons of interest na suno pa sila nga natumod kun sa diin natalana nga pasakaan sang kaso ang mga ini.
